Programa Empregu Rural Benefisiu Ba kompania La Fo Benefisiu Ba Estadu

Hakerek hosi Feliciano Ximenes

sepfope.blogspot.com

Molok atu le’e kontuidu ida ne’e, hau hakarak fo hanoin uluk ba kolegas sira hotu katak, kontuidu sira ne’e laiha hanoin atu kondena, atu ofensa, atu halo at, kontuidu ida ne’e mai hosi hau nia hanoin rasik, hau nia analiza rasik no bazeia ba rezultadu implementasaun fiziku iha terenu, karik ema ruma ou grupu ou organizasaun ruma sente ofensa, hau laiha hanoin atu ofensa ema ida, mak ne’e lai, obrigado.

Basea ba resolusaun Conselho do Ministro no. 24/2013 de 2 de Outburo, Programa Empregu Rural halao atividades sira hanesan rehabilitasaun no loke estrada foun, konstrusaun no rehabilitasaun barajen no valetas, konstrusaun ponte kiik no sanitario publiku no programa turismu komunitario. Iha tinan 2013, programa nee halao ona iha fatin 74. Ba tinan 2014 planu implementasaun ba programa nee fixu iha fatin 73, programa turismu komunitario iha fatin 4, konstrusaun sanitario publiku iha fatin 3 no programa harii uma lima iha fatin 2. Programa sira ne’e halao iha 13 distritu ho sistema partisipativu husi komunidade.

Basea ba Resolucao Concelho do Ministru no.24/2013 de 2 de Outubro Objektivu husi programa nee atu promove kriasaun ba empregu temporaria, involve komunidade ba prosesu desenvolvimentu, fo insentiva kualidade ba konstrusaun, rehabilitasaun e manutensaun ba infrastrutura iha area rurais, involve seitor privado ka empreza lokal iha aktividade PER no promove partisipaun lider komunitario, representante linha ministeriais relevantes no seitor privado hodi halo determinasaun ba areas prioridades. Husi objektivu iha leten lalaok programa nee hanesan tuir mai nee:

1.        Lider komunitariu identifika problema infrastrutura iha suku laran no koordena ho autoridade lokal hanesan administrador do distritu no sub distritu hodi hatama proposta ba SEPFOPE.

2.        Lider komunitaria ho Autoridade Lokal rekomenda grupo /seitor komunitariu/kompania lokal nebe iha kapasidade no ekipamentus atu realiza konstrusaun nebe identifika.

3.        Ekipa tekniku SEPFOPE rekorda proposta iha baze de dadus.

4.        Secretario do Estado no Direktor Nacional Emprego hamutuk ho ekipa enjineiru SEPFOPE halo avaliasaun ba proposta ho objektivu atu haree nebe mak prioridade atu halo uluk.

5.        Husi avaliasaun nee, ekipa enjineiru sei tun ba fatin nebe identifikado hodi halo survei no haree fila fali desenho nebe mak halo husi grupo/seitor komunitariu/kompania no sura fila fali orsmanetu nebe mak tau ona iha proposta laran.

6.        Halao kontratu husi SEPFOPE ho kompania nebe selesionado ho kontratu klaru fo servisu temporario ba komunidade minimu ema 40 & maksimum ema 106.

iha parte seluk, programa empregu rural implementa latuir guia hira mak mensiona iha leten, ezemplu mak konstrusaun loke Estrada foun iha munisipiu Viquque iha suku Bahalarawain no umawain kraik, no seluk mak hanesan projetu gabion protection iha mota hatuhaco, Liabala, venilale. Projetu sira refere laiha benefisiu ba estadu,tanba saida hau hateten laiha benefisiu ba estadu?

Tuir mai rezultadu analiza no observasaun real bazeia ba rezultadu monitorizasaun iha terenu

1.       Projetu empregu rural loke estada foun, maibe iha realidade, loron ida, laiha transporte ida mak utiliza, entaun Estrada ne’e loke ba se?

2.       Estrada balun loke liga ba tasi, liga ba natar, liga ba kampu, maibe laiha komunidade mak hela iha area neba.

3.       La benefisia no la loke kampu trabalu tanba kompania mai ho nia alat berak, entaun se mak halo serbisu? Oinsa envolvimentu komunidade nian? Se mak hetan lukru?

4.       La forma ema atu sai komunidade ne’ebe kuidadu sasan ka obra refere tanba komunidade la sente katak obra ne’e sira nian, obra ne’e kompania nian.

5.       Adjudikasaun direita, signifika, chefi suku susar atu deklara nia konflitu interese, pior liu tan kompania ne’ebe kaer obra ne’e iha ligasaun familia ho ofisial projetu nain no mos chefi suku.

6.       Laiha kontrola ne’ebe diak, konstrusaun fiziku diferensia ho dezenu, dalan ikus, enjineru halo justifikasaun eskrita hodi bele resolve area legal, entaun lukru ne’e foti tomak hosi kompania,

7.       Enjineiru halo justifikasaun esrita ida ho kontuidu reduz volume serbisu, troka medida material no marka maibe iha BoQ la mudansa ba total alokasaun orsamentu, husi parte ne’e direita ou indireita fo lukru tomak ba kompania no nafatin laiha garantia kualidade ba estadu no laiha benefisiu ba estadu.

8.       Realidade guia ne’ebe hatudu momos ba ita katak envolvimentu komunidade ne’e tengki ser to 40 pesoas, na realidade laiha lista eskrita ida katak envolvimentu ne’e akontese duni iha baze, entaun povu iha baze hakilar nafatin ba estadu no laiha sentidu katak obra ne’e sira nia, komunidade lakohi atu kuidadu ba sasan sira.